آواز دی وائس،نئی دہلی

مرکز میں مودی حکومت کے آٹھ سال مکمل ہونے پر ہماچل پردیش کی راجدھانی شملہ میں ایک شاندار پروگرام کا انعقاد کیا گیا۔ پروگرام سے خطاب کرنے سے پہلے وزیراعظم نریندر مودی نے 8 وزارتوں کی 16 اسکیموں کے منتخب استفادہ کنندگان کے ساتھ ورچوئل بات چیت کی۔

 اس دوران کرناٹک کے کالبرگی کی ایک خاتون استفادہ کنندہ سے بات کرنے کے بعد مودی نے کہا کہ اگر میں وہاں ہوتا تو الیکشن لڑوا دیتا۔

دراصل وزیر اعظم نریندر مودی کرناٹک کے کلبرگی کے رہنے والے سنتوشی سے بات کر رہے تھے، جو آیوشمان بھارت ہیلتھ اینڈ ویلنس سنٹر اسکیم سے مستفید ہیں۔

وزیر اعظم مودی نے سنتوشی سے پوچھا کہ آپ کو کس چیز نے مطمئن کیا؟

اس پر انہوں نے کہا کہ 'ہمیں وزیر اعظم سے بات کرنے کا موقع ملا، اس لیے میں خود کو خوش قسمت سمجھتی ہوں۔'

اس کے بعدمودی نے پوچھا کہ آپ کو حکومت کی اسکیم سے کیا فائدہ ہوا؟

 اس پر سنتوشی نے کہا کہ پہلے ہمارے گھر، گاؤں میں یہ سہولت نہیں تھی۔ اس وقت بہت پریشانی تھی۔ ادویات کا حصول مشکل تھا لیکن جب سے ہیلتھ اینڈ ویلنس سنٹر ہمارے یہاں کھلا ہے۔ میری ماں سمیت پورے گاؤں کو فائدہ ہو رہا ہے۔

ادویات مفت مل رہی ہیں، ہم سب صحت مند ہیں۔ سنتوشی کی بات سننے کے بعد وزیر اعظم نے کہا کہ آپ کنڑ میں بول رہے تھے لیکن میں آپ کی باتوں سے محسوس کر سکتا ہوں کہ آپ کو کتنا اطمینان ہوا ہے۔

وزیراعظم مودی نے کہا کہ جس طرح آپ نے بات کی ہے، اگر میں کرناٹک میں ہوتا اور بی جے پی کارکن کے طور پر کام کر رہا ہوتا تو میں آپ کو الیکشن لڑنے پر مجبور کرتا۔ آپ گاؤں کے سب سے بڑے لیڈر بن سکتے ہیں۔ آپ نے اسکیم کے فوائد کو اچھی طرح اور تفصیل سے بتایا ہے۔

وزیراعظم مودی کی بات سن کر کلبرگی میں موجود لوگوں نے تالیاں بجا کرمودی کا شکریہ ادا کیا۔ بتادیں کہ شملہ میں منعقد اس پروگرام سے وزیر اعظم نریندر مودی نے کسان سمان ندھی کی 21,000 کروڑ روپے کی 11ویں قسط بھی جاری کی ہے۔ اب تک کسانوں کے کھاتوں میں 2 لاکھ کروڑ روپے سے زیادہ پہنچ چکے ہیں۔

اجتماع سے خطاب کرتے ہوئے وزیر اعظم نریندر مودی نے کہا کہ 2014 سے پہلے اخبار کی سرخیاں ہوا کرتی تھیں - لوٹ کھسوٹ، کرپشن، گھوٹالے، اقربا پروری، نوکر شاہی، پھنسے اور پھٹی اسکیمیں۔ آج، حکومت کی ان اسکیموں کے بارے میں بحث ہو رہی ہے، جنہوں نے بہت سے لوگوں کی زندگیوں میں بہتری لائی ہے۔