اسلام آباد/ آواز دی وائس

پاکستان میں سیاسی کشیدگی جمعرات کو اُس وقت مزید بڑھ گئی جب پی ٹی آئی کی حمایت یافتہ اپوزیشن اتحاد تحریک تحفظِ آئینِ پاکستان نے 27ویں آئینی ترمیم کی منظوری کے بعد ملک گیر احتجاج شروع کرنے کی تیاری کی۔ یہ صورتحال اُس وقت پیدا ہوئی جب پاکستان کی اعلیٰ عدالت کے ججوں نے اس ترمیم کے خلاف استعفے دے دیے۔

ٹی ٹی اے پی  کا ایک اہم پارلیمانی اجلاس محمود خان اچکزئی کی زیرِ صدارت ہوا، جس میں پی ٹی آئی چیئرمین بیرسٹر گوہر علی خان، اسد قیصر اور کئی اراکین قومی اسمبلی نے شرکت کی۔ اتحاد نے ایکس (سابق ٹوئٹر) پر لکھا کہ سب سے اہم اجلاس جاری ہے اور اہم ترین فیصلوں کی امید ہے۔ ڈان کے مطابق، سابق اسپیکر قومی اسمبلی اسد قیصر نے کہا کہ اجلاس میں آئینی ترمیم کے بعد کی سیاسی صورتحال پر گفتگو ہوئی۔ انہوں نے کہا کہ شرکاء اس بات پر متفق تھے کہ موجودہ حکومت ملک چلانے کی اہل نہیں… ملک خانہ جنگی کے دہانے پر ہے۔

قیصر نے مزید بتایا کہ اچکزئی نے مذہبی جماعتوں کو شامل کرنے اور جمعہ کے روز پورے ملک میں احتجاج کی ضرورت پر زور دیا۔ انہوں نے کہا کہ ججوں کے فیصلے عوامی بے چینی کی علامت ہیں۔انہوں نے کہا کہ ہم عدلیہ سے اپیل کرتے ہیں کہ وہ مضبوطی سے کھڑی ہو، کیونکہ پوری قوم اس معاملے پر اس کے ساتھ کھڑی ہوگی۔ ٹی ٹی اے پی رہنماؤں نے بتایا کہ جمعے کو ہونے والے اگلے اجلاس کے بعد مشترکہ احتجاجی منصوبے کا اعلان کیا جائے گا۔ عمران خان سے ملاقات میں رکاوٹ، سیاسی تناؤ مزید بڑھ گیا

سیاسی کشیدگی اُس وقت اور بڑھ گئی جب خیبر پختونخوا کے وزیراعلیٰ سہیل آفریدی کو مسلسل چھٹی بار اڈیالہ جیل میں پی ٹی آئی کے بانی عمران خان سے ملاقات سے روک دیا گیا۔ آفریدی، راجہ ناصر عباس اور جنید اکبر کے ہمراہ پہنچے تھے، لیکن انہیں داخلے سے منع کردیا گیا۔ انہوں نے ناراضی کا اظہار کرتے ہوئے کہا کہ کیا میں ان کے ساتھ جوہری رازوں پر بات کرنے جا رہا ہوں؟ انہوں نے سکیورٹی اداروں سے کہا کہ ملکی سرحدوں کے دفاع پر توجہ دیں اور سیاسی معاملات کو سیاسی طور پر حل ہونے دیں۔

۔27ویں آئینی ترمیم  فوجی سربراہ کو وسیع اختیارات

پاکستان کے صدر آصف علی زرداری نے 13 نومبر کو 27ویں آئینی ترمیم پر دستخط کر دیے۔ اس ترمیم کے تحت آرمی چیف جنرل عاصم منیر کو وسیع اختیارات مل گئے ہیں، اور اب وہ چیف آف ڈیفنس فورسز بن گئے ہیں، جس کے تحت فضائیہ اور بحریہ بھی ان کے ماتحت آ گئی ہیں۔

ترمیم کے مطابق

ایک نیا فیڈرل کونسٹی ٹیوشنل کورٹ قائم کیا جائے گا

اس کا چیف جسٹس حکومت مقرر کرے گی

یہ عدالت آئینی معاملات، بین الحکومتی تنازعات اور وہ درخواستیں سنے گی جو پہلے سپریم کورٹ میں جاتی تھیں

بنیادی حقوق سے متعلق کئی مقدمات بھی اب ایف سی سی کے دائرے میں آ جائیں گے۔

ان وسیع تبدیلیوں نے وکلاء اور اپوزیشن میں شدید تشویش پیدا کر دی ہے، جنہیں خدشہ ہے کہ عدلیہ کی آزادی متاثر ہو سکتی ہے۔

ججوں کا ردِعمل ،سماعتوں سے علیحدگی کا عندیہ

۔27ویں ترمیم کے قانون بننے کے فوراً بعد اسلام آباد ہائی کورٹ کے دو جج

جسٹس محسن اختر کیانی، جسٹس سمن رفعت امتیاز نے عندیہ دیا کہ وہ دسمبر میں مقدمات کی سماعت کے لیے دستیاب نہیں ہوں گے۔ یہ بیانات اس قیاس آرائی کے دوران سامنے آئے کہ ترمیم کے بعد عدلیہ میں تبادلے اور انتظامی ردوبدل ہونے والا ہے۔ ایک سماعت کے دوران جسٹس کیانی نے وکیل سے کہا کہ دسمبر کے پہلے ہفتے میں اس کیس کی سماعت کے لیے یہاں ایک اور جج بیٹھا ہوگا۔