نئی دہلی: ہریانہ کے سابق وزیر اعلیٰ اوم پرکاش چوٹالہ کو غیر متناسب اثاثہ جات کیس میں 4 سال قید کی سزا سنائی گئی ہے۔ دہلی کی راؤس ایونیو کورٹ کی خصوصی سی بی آئی جج وکاس دھول نے بھی ان پر 50 لاکھ روپے کا جرمانہ عائد کیا ہے۔ ساتھ ہی عدالت نے چوٹالہ کی 4 جائیدادیں ضبط کرنے کا حکم دیا ہے۔ یہ جائیدادیں دہلی کے ہیلی روڈ، گروگرام، اسولا اور پنچکولہ میں واقع ہیں۔

۔ 2006 میں سی بی آئی نے اوم پرکاش چوٹالہ کے خلاف ایف آئی آر درج کی تھی۔ انڈین نیشنل لوک دل کے سربراہ چوٹالہ پر 1993 سے 2006 کے درمیان غیر متناسب اثاثے جمع کرنے کا الزام تھا۔ 16 سال کے مقدمے کے بعد، وہ 21 مئی کو اپنی آمدنی سے غیر متناسب 2.81 کروڑ روپے کے اثاثے حاصل کرنے کا مجرم پائے گئے۔

انھیں انسداد بدعنوانی ایکٹ کی دفعہ 13(1)(ای) اور 13(2) کے تحت سزا سنائی گئی۔ ان دفعات میں 1 سے 7 سال تک قید کی سزا ہے۔ 87 سالہ اوم پرکاش چوٹالہ کے وکیل نے بڑھاپے اور خراب صحت کا حوالہ دیتے ہوئے رعایت کی درخواست کی تھی۔

چوٹالہ کے وکیل نے بھی درخواست کی تھی کہ انھیں غیر متناسب اثاثہ جات کیس میں سزا کے ساتھ شمار کیا جائے لیکن عدالت نے اسے قبول نہیں کیا اور چوٹالہ کو 4 سال قید کی سزا سنائی، واضح ہوکہ ٹیچربھرتی گھوٹالہ میں چوٹالہ سزا کاٹ چکے ہیں۔

عدالت نے 50 لاکھ روپے کا جرمانہ عائد کرتے ہوئے کہا کہ اگر یہ رقم جمع نہیں کرائی گئی تو چوٹالہ کو 6 ماہ کی اضافی سزا بھگتنی ہوگی۔

چوٹالہ چار بار ہریانہ کے وزیر اعلیٰ رہ چکے ہیں۔ پہلی بار وہ 2 دسمبر 1989 سے 22 مئی 1990 تک ریاست کے وزیر اعلیٰ رہے، دوسری بار 12 جولائی 1990 سے 17 جولائی 1990 تک، تیسری بار 22 مارچ 1991 سے 6 اپریل 1991 تک اور چوتھی بار 24 جولائی 1999 سے 5 مارچ 2005 تک وزیر اعلیٰ رہے۔

مرکزی تفتیشی بیورو (سی بی آئی) نے چوٹالہ کے خلاف تحقیقات کے بعد 26 مارچ 2010 کو چارج شیٹ داخل کی تھی۔ جانچ ایجنسی نے چارج شیٹ میں کہا تھا کہ 1993 سے 2006 کے درمیان چوٹالہ نے اپنی آمدنی کے نامعلوم ذرائع سے 6.09 کروڑ روپے کے اثاثے جمع کررکھے تھے۔

انفورسمنٹ ڈائریکٹوریٹ نے بھی اس معاملے میں ان کے خلاف منی لانڈرنگ روک تھام ایکٹ (پی ایم ایل اے ) کے تحت کارروائی کرتے ہوئے نئی ​​دہلی، پنچکولہ اور سرسا میں ان کی کل 3.68 کروڑ روپے کے پلاٹ اور فلیٹ 2019 میں ضبط کر لیے تھے۔

سی بی آئی کی خصوصی عدالت کے جج وکاس ڈھل نے استغاثہ کی طرف سے دائر شواہد اور پیش کردہ دلائل سننے کے بعد 23 مئی 2022 کو چوٹالہ کو انسداد بدعنوانی ایکٹ کی دفعہ 13(1) اور 13(2) کے تحت مجرم قرار دیاتھا۔ چوٹالہ کے وکیل نے ان کے طبی معائنے کے لیے عدالت سے چار دن کا وقت مانگا تھا لیکن خصوصی جج مسٹر ڈھل نے درخواست مسترد کر دی۔