نئی دہلی

پارلیمنٹ کے مانسون سیشن کو 12 دن گزر چکے ہیں ، لیکن اپوزیشن پیگاسس جاسوسی کیس اور کسانوں کی تحریک جیسے کئی مسائل پر احتجاج جاری رکھے ہوئے ہے۔

اس تعطل کی وجہ سے پارلیمنٹ کی کارروائی بری طرح متاثر ہوئی ہے۔ پارلیمنٹ ،اب تک دونوں ایوانوں میں 107 گھنٹوں میں سے صرف 18 گھنٹے چل سکی ہے۔

اس سے ٹیکس دہندگان کو 133 کروڑ روپے کا نقصان ہوا۔ پارلیمنٹ کا مانسون سیشن 19 جولائی کو شروع ہوا ، لیکن اب تک دونوں ایوانوں کی کارروائی متاثر ہوئی ہے۔ مانسون سیزن میں اب تک 89 گھنٹوں کا ہنگامہ دیکھا گیا ہے۔

سیشن 13 اگست تک جاری رہنا ہے۔ راجیہ سبھا کی کاروائی مقررہ وقت کے صرف 21 فیصد تک جاری رہی ہے ، جبکہ لوک سبھا کی کاروائی صرف 13 فیصدچلی ہے۔ لوک سبھا 54 گھنٹوں میں سے 7 گھنٹے سے کم چل پائی ، جبکہ راجیہ سبھا 53 گھنٹوں میں سے 11 گھنٹے جاری رہی۔

اپوزیشن جاسوسی کے معاملے پر بات کرنے پر قائم ہے۔ ہنگامہ آرائی کی وجہ سے ، مانسون سیشن کے دوسرے ہفتے میں ایوان کی پیداواری صلاحیت میں 13.70 فیصد کمی واقع ہوئی۔

پہلے ہفتے میں یہ تعداد 32.20 فیصد تھی۔ اس معاملے پر اپوزیشن کا کہنا ہے کہ جب تک حکومت جاسوسی کے معاملے پر بحث کے لیے تیار نہیں ہوتی، احتجاج ختم نہیں ہوگا۔ پارلیمانی امور کے وزیر پرلہاد جوشی نے اس مطالبے کو مسترد کردیا ہے اور لوک سبھا میں کہا ہے کہ یہ کوئی مسئلہ نہیں ہے۔