نئی دہلی :قومی تحقیقاتی ایجنسی (این آئی اے) نے منگل کو پاکستان میں مقیم دہشت گرد شہزاد بھٹی سے منسلک دہشت گرد-گینگسٹر نیٹ ورک کے تین مقدمات کی تحقیقات کے سلسلے میں پنجاب اور ہریانہ میں 18 مقامات پر چھاپے مارے۔ این آئی اے کی ٹیموں نے دونوں ریاستوں کے نو اضلاع میں واقع 18 مقامات پر تلاشی کارروائیاں کیں اور اہم معلومات حاصل کرنے کے لیے متعدد افراد سے پوچھ گچھ کی۔ ایجنسی نے ایک بیان میں یہ اطلاع دی۔

تلاشی کے دوران این آئی اے نے کئی ڈیجیٹل آلات، دستاویزات اور مختلف مواصلاتی نیٹ ورکس، مالی لین دین اور زیرِ تفتیش افراد کی سرگرمیوں سے متعلق معلومات بھی ضبط کیں۔ این آئی اے کے مطابق، جمع کیے گئے تمام شواہد اور معلومات کو مزید جانچ، فرانزک اور تکنیکی معائنے کے لیے بھیج دیا گیا ہے تاکہ سرحد پار پھیلی ہوئی وسیع سازش کا پردہ فاش کیا جا سکے۔

انسدادِ دہشت گردی ایجنسی نے بتایا کہ بعض افراد کو نوٹس جاری کیے گئے ہیں تاکہ وہ مزید پوچھ گچھ کے لیے تفتیش میں شامل ہوں۔ یہ کارروائی سرحد پار سے گینگسٹر سے دہشت گرد بننے والے شہزاد بھٹی کے چلائے جانے والے نیٹ ورک کے پسِ پردہ بڑی سازش کو بے نقاب کرنے کی کوششوں کا حصہ ہے۔ این آئی اے نے کہا کہ چھاپوں کا مقصد ’’شہزاد بھٹی کے ساتھیوں اور تینوں مقدمات سے متعلق دہشت گردی کی سازش میں ملوث دیگر افراد کی شناخت‘‘ کرنا تھا۔

تحقیقات کے دوران این آئی اے نے مارچ 2025 میں پنجاب کے جالندھر میں سوشل میڈیا انفلوئنسر راجر سندھو کی رہائش گاہ پر ہوئے گرینیڈ حملے کے تانے بانے شہزاد بھٹی سے جوڑے ہیں۔ اپریل 2026 میں این آئی اے نے اس مقدمے میں مفرور ملزم شہزاد بھٹی اور ایک دوسرے ملزم کے خلاف چارج شیٹ داخل کی تھی۔

این آئی اے نے یہ بھی انکشاف کیا ہے کہ نومبر 2025 میں ہریانہ کے سرسا میں خواتین پولیس تھانے میں ہونے والے دھماکے اور جنوری 2026 میں ہریانہ کے امبالہ میں بلدیو نگر پولیس اسٹیشن میں ہونے والے بم دھماکے کا ماسٹر مائنڈ بھی شہزاد بھٹی تھا۔ سرسا دھماکہ کیس میں این آئی اے نے مئی 2026 میں شہزاد بھٹی اور پاکستان میں موجود ایک اور ہینڈلر سہیل احمد عرف سہیل بلوچ سمیت نو افراد کے خلاف چارج شیٹ داخل کی تھی۔ بلدیو نگر پولیس اسٹیشن کیس ایک کار بم دھماکے سے متعلق ہے، جس میں گرفتار ایک ملزم کے شہزاد بھٹی کے ساتھ رابطے ہونے کا انکشاف ہوا تھا۔