نئی دہلی: مہاراشٹر کے کابینی وزیر اور نیشنلسٹ کانگریس پارٹی (این سی پی) کے رہنما نواب ملک نے سپریم کورٹ سے رجوع کیا ہے جس میں انڈر ورلڈ ڈان داؤد ابراہیم سے متعلق منی لانڈرنگ کیس میں عدالتی حراست سے رہائی کی درخواست کو مسترد کرتے ہوئے بمبئی ہائی کورٹ کے حکم کو چیلنج کیا ہے۔

مذکورہ معاملے کی تحقیقات کی جارہی ہے۔ انفورسمنٹ ڈائریکٹوریٹ جانچ کر رہی ہے۔

بمبئی ہائی کورٹ کے جسٹس پرسنا بی ورالے اور شری رام ایم موڈک کی بنچ نے 15 مارچ کو ملک کی جانب سے درخواست کے زیر التوا ہونے کے دوران ان کی رہائی کے لیے حبس بے جا کی درخواست میں مانگی گئی ضمانت کو مسترد کر دیا تھا۔

رشمی کانت اینڈ پارٹنرز کے ذریعے داخل کردہ اپنی درخواست میں، ملک نے انفورسمنٹ کیس انفارمیشن رپورٹ ، ان کی گرفتاری اور ان کے ریمانڈ کو غیر قانونی قرار دیتے ہوئے چیلنج کیا تھا۔

انھوں نے کہا تھا کہ ان کی قید غیر قانونی ہے،اور وہ فوری رہائی کے حقدار ہیں۔ انہوں نے 23 فروری کے خصوصی پی ایم ایل اے جج کے حکم کو بھی مسترد کرنے کا مطالبہ کیا جس کے ذریعہ انہیں 8 دن کے لئے ای ڈی کی حراست میں بھیج دیا گیا تھا۔

ای ڈی نے ابتدائی جواب کے ساتھ عرضی کی مخالفت کی تھی، یہ دعویٰ کرتے ہوئے کہ ملک نے اپنی درخواست میں کاروائی کے متعدد اسباب کو یکجا کرنے کی کوشش کی تھی، جو قابل عمل نہیں تھی۔

ایجنسی نے اس بنیاد پر رٹ پٹیشن کو خارج کرنے کا مطالبہ کیا کہ اسے دائر کرنا جاری تحقیقات کو پٹڑی سے اتارنے کے لیے ایک پیچیدہ حربہ ہے۔