راجوری
جموں و کشمیر کے راجوری فاریسٹ ڈویژن کے متعدد مقامات پر ایک بڑی جنگلاتی آگ بھڑک اٹھی ہے، جس کے بعد محکمۂ جنگلات، فاریسٹ پروٹیکشن فورس (ایف پی ایف) اور مقامی رہائشیوں نے آگ پر قابو پانے اور اسے مزید پھیلنے سے روکنے کے لیے بڑے پیمانے پر کارروائی شروع کر دی ہے۔
حکام کے مطابق آگ نے کھڈیاں، انڈرولا، چکلی، میاہادی اور بتھونی بلاک کے جنگلاتی علاقوں کو اپنی لپیٹ میں لے لیا ہے۔ منگل کے روز آگ بجھانے کی کارروائیاں جاری رہیں اور صورتحال پر قابو پانے کے لیے تمام دستیاب عملہ تعینات کر دیا گیا۔
اے این آئی سے گفتگو کرتے ہوئے محکمۂ جنگلات کے افسر راجیش کمار نے کہا کہ شدید لاجسٹک مشکلات کے باوجود متاثرہ علاقوں میں عملہ متحرک کر دیا گیا ہے۔انہوں نے کہا کہ پورا عملہ تعینات کر دیا گیا ہے۔ آگ چکلی، کھڈیاں اور انڈرولا کے علاقوں میں لگی ہوئی ہے۔ یہ علاقے اتنے دور دراز ہیں کہ فائر بریگیڈ کی گاڑیاں وہاں تک نہیں پہنچ سکتیں۔ امید ہے کہ شام تک آگ پر قابو پا لیا جائے گا۔
حکام کا کہنا ہے کہ دشوار گزار راستوں اور متاثرہ جنگلاتی علاقوں کی دور افتادگی نے آگ بجھانے کی کوششوں کو مشکل بنا دیا ہے، جس کے باعث ٹیموں کو زیادہ تر دستی طریقوں سے شعلوں پر قابو پانے کی کوشش کرنی پڑ رہی ہے۔مقامی باشندے بھی امدادی کارروائیوں میں شامل ہو گئے ہیں اور محکمۂ جنگلات کے اہلکاروں کے ساتھ مل کر آگ کو قریبی علاقوں تک پھیلنے سے روکنے کے لیے کام کر رہے ہیں۔
آگ بجھانے کی کوششوں میں شریک ایک مقامی رہائشی نے بتایا کہ گاؤں کے لوگ گزشتہ روز سے مسلسل آگ پر قابو پانے کی کوشش کر رہے ہیں۔انہوں نے کہا کہ کل رات دیر تک ہم آگ بجھانے میں مصروف رہے۔ میں تقریباً رات 12 بجے گھر پہنچا۔ ہم محکمہ کے ساتھ مل کر آگ بجھانے کی کوشش کر رہے ہیں، لیکن آگ بہت بڑی ہے اور اس پر قابو پانا انتہائی مشکل ہے۔
ابھی تک حکام نے اس بات کا تخمینہ جاری نہیں کیا ہے کہ آگ سے کتنا رقبہ متاثر ہوا ہے یا جنگلات اور جنگلی حیات کو کس حد تک نقصان پہنچا ہے۔ تاحال کسی جانی نقصان یا زخمی ہونے کی اطلاع نہیں ملی ہے۔آگ لگنے کی وجہ بھی ابھی تک معلوم نہیں ہو سکی ہے۔ محکمۂ جنگلات کے افسران صورتحال پر مسلسل نظر رکھے ہوئے ہیں اور آگ کو مزید جنگلاتی حصوں تک پھیلنے سے روکنے کے لیے کوششیں تیز کر دی گئی ہیں۔
دریں اثنا، مقامی انتظامیہ اور محکمۂ جنگلات کا عملہ ہائی الرٹ پر ہے جبکہ راجوری فاریسٹ ڈویژن کے متاثرہ علاقوں میں آگ بجھانے کی کارروائیاں مسلسل جاری ہیں۔
