نئی دہلی: جموں و کشمیر کے کشتواڑ ضلع میں اگست کے مہینے میں ماچیل ماتا یاترا کے دوران چشوتی علاقے میں بادل پھٹنے سے ہونے والی ہولناک تباہی میں لاپتہ ہوئے 31 افراد کو اب مردہ قرار دینے کا عمل شروع ہو گیا ہے۔

انتظامیہ نے عام طور پر لاپتہ شخص کو مردہ قرار دینے کے لیے لازم سات سال کی قانونی مدت کا انتظار کیے بغیر، خصوصی حالات میں فوری فیصلہ لینے کا راستہ اختیار کیا ہے۔ اس فیصلے کے بعد حادثے میں ہلاک افراد کی کل سرکاری تعداد 91 مانی جائے گی۔ سب ڈویژنل مجسٹریٹ (ایس ڈی ایم) کے مطابق، "لاپتہ افراد کو مردہ قرار دینے کی کارروائی شروع کر دی گئی ہے۔

مجسٹریٹ اور پولیس کی مشترکہ جانچ کے بعد رپورٹ ڈسٹرکٹ مجسٹریٹ کو بھیجی جائے گی۔" انہوں نے بتایا کہ عام حالات میں کسی لاپتہ شخص کو مردہ قرار دینے میں سات سال لگتے ہیں، لیکن قدرتی آفات کے دوران اس عمل کو تیز رفتاری سے مکمل کرنے کی اجازت ہوتی ہے۔ اس طرح کی مثالیں پہلے اتراکھنڈ کی تباہی اور 2014 کی کشمیر کی سیلاب کے دوران بھی دیکھی گئی تھیں۔

ان کے مطابق، جانچ کے دوران تمام متعلقہ فریقوں کے دعووں اور اعتراضات پر غور کیا جائے گا۔ اس مقصد کے لیے 30 دن کا عوامی نوٹس جاری کیا گیا ہے، تاکہ اہلِ خانہ یا کوئی بھی متعلقہ شخص اپنی رائے پیش کر سکے۔ یہ پوری کارروائی تقریباً دو ماہ میں مکمل ہونے کی امید ہے۔ 14 اگست کو آنے والی اس قدرتی آفت نے تباہی اور ہلاکتوں کا دل دہلا دینے والا منظر چھوڑا تھا۔

اچانک آنے والے سیلاب نے یاتریوں کے لیے لگائے گئے لنگر، متعدد مکانات اور مویشیوں کو بہا دیا۔ سڑکیں اور پل تباہ ہو گئے، اور مواصلاتی نظام کے منقطع ہونے سے علاقہ کئی دنوں تک بیرونی دنیا سے کٹ گیا۔ بچاؤ دستوں کو تباہ شدہ علاقوں سے گزر کر طویل فاصلہ طے کرنا پڑا، لیکن لاپتہ افراد کا کوئی سراغ نہیں مل سکا۔

کچھ لاشوں کے اعضا ملے جنہیں شناخت کی تصدیق کے لیے ڈی این اے ٹیسٹ کے لیے بھیجا گیا ہے۔ لاپتہ افراد کو مردہ قرار دینے کا یہ سرکاری عمل طویل اور صبر آزما تلاش مہم کا دکھ بھرا اختتام ثابت ہوگا۔ تاہم اس کے ساتھ ہی متاثرہ خاندانوں کے لیے سرکاری معاوضہ اور قانونی امداد حاصل کرنے کی راہ بھی ہموار ہو جائے گی۔