نئی دہلی/ آواز دی وائس

دہلی کے لال قلعے کے قریب ہوئے دھماکے کے بعد اینٹی ٹیرر اسکواڈ نے انٹگرل یونیورسٹی انتظامیہ سے 60 طلبہ و طالبات کی تفصیلی رپورٹ طلب کی ہے۔ اسی یونیورسٹی میں ڈاکٹر پرویز پڑھایا کرتا تھا، جس نے دہلی دھماکے سے ٹھیک تین دن پہلے استعفیٰ دیا تھا۔ ڈاکٹر پرویز، ڈاکٹر شاہین کا سگا بھائی ہے، اسی لیے اے ٹی ایس پورے معاملے کی باریکی سے جانچ کرنا چاہتی ہے۔ منگل کو اے ٹی ایس نے جی ایس وی ایم میڈیکل کالج کے پرنسپل ڈاکٹر سنجے کلا سے پوچھ گچھ  کی اور مختلف دستاویزات کی جانچ کی۔

ڈاکٹر محمد عارف اے ٹی ایس کی حراست میں

اے ٹی ایس نے شاہین صدیقی کے قریبی بتائے جانے والے ڈاکٹر محمد عارف کو ان کے کانپور میں واقع گھر سے حراست میں لیا ہے۔ جانچ اور سیکیورٹی ایجنسیاں اب ان سے ہر پہلو پر گہری پوچھ گچھ کر رہی ہیں۔ محمد عارف نے تین ماہ پہلے ہی کانپور کے ہردے روج انسٹی ٹیوٹ میں جوائن کیا تھا۔ جب یوپی کے سب سے بڑے کارڈیالوجی ادارے سے ان کا رشتہ سامنے آیا تو ادارے کے ڈائریکٹر راکش ورما نے فوری قدم اٹھاتے ہوئے تمام ڈاکٹروں کی ویریفیکیشن کرانے کا فیصلہ کیا۔

تین طرح کا ویریفیکیشن لازمی قرار

کارڈیالوجی کے ڈائریکٹر ڈاکٹر راکش کمار ورما کے مطابق ادارے میں جتنے بھی ڈاکٹر کام کر رہے ہیں، انہیں اب پیشے کے وقار کو برقرار رکھنے کے لیے تین مرحلوں والی ویریفیکیشن سے گزرنا ہوگا۔ انہوں نے بتایا کہ ڈاکٹر محمد عارف فرسٹ ایئر ڈی ایم اسٹوڈنٹ کے طور پر اگست 2025 سے کام کر رہے تھے۔ ان کے مطابق

عارف ایک باصلاحیت طالب علم لگتے تھے

ان کا رویہ بھی بہتر تھا

ان کا انتخاب آل انڈیا سلیکشن کے ذریعے ہوا تھا

پہلے ان کا انتخاب سنجے گاندھی میں ہوا، پھر اپ گریڈیشن کے بعد کانپور میں تعیناتی ہوئی

عارف اپنے کام میں ایماندار تھا

ڈائریکٹر کے مطابق عارف یہاں اپنے کام کو پوری ایمانداری سے کر رہا تھا، لیکن اس کی نجی زندگی میں کیا چل رہا تھا، اس کے بارے میں میں کچھ نہیں کہہ سکتا۔ یہ سب سیکیورٹی ایجنسیاں بہتر انداز میں جانچ رہی ہیں۔ انہوں نے مزید بتایا کہ ابھی تک کسی جانچ ایجنسی نے کارڈیالوجی انسٹی ٹیوٹ سے رابطہ نہیں کیا۔ اگر رابطہ کیا جاتا ہے تو ادارہ مکمل تعاون کرے گا۔