آواز دی وائس، سری نگر

روس اور یوکرین میں جاری جنگ کا آج 9واں دن ہے۔ حالات خطرناک ہوتے جا رہے ہیں۔ روسی فوج کی پیش قدمی جاری ہے۔ یوکرین میں ہر طرف تباہی مچی ہوئی ہے۔

ادھر کشمیر میں شادی کرنے والی یوکرین کی دلہن نے وزیر اعظم نریندر مودی سے اپنے ملک میں جاری جنگ روکنے کی اپیل کی ہے۔

انہوں نے یوکرین کے لوگوں کو انسانی امداد فراہم کرنے کی بھی درخواست کی۔

خیال رہے کہ یوکرین سے تعلق رکھنے والی آسیہ کی شادی کشمیر کے پلوامہ ضلع کے مندورا گاؤں کے رہنے والے بلال احمد سے ہوئی ہے۔ بلال ایک بزنس مین ہے۔ دونوں کی ملاقات 2013 میں گوا میں ہوئی تھی۔ جلد ہی دونوں کی دوستی محبت میں بدل گئی۔ جوڑے نے 2014 میں شادی کی تھی اور اب ان کے دو بچے ہیں۔ پہلے ان کا نام علیزہ تھا۔ اسلام قبول کرنے کے بعد انہوں نے اپنا نام آسیہ  رکھ لیا۔

 آسیہ نے بتایا کہ وہ جنگ کے آغاز سے روزانہ اپنے والدین سے بات کرتی رہی ہیں۔ ٹی وی پر خبریں دیکھ کر وہاں کے حالات دیکھ کر بہت تکلیف ہوتی ہے۔ یوکرین کے حالات بہت خراب ہیں اور روسی فوج فوجی اڈوں کے ساتھ ساتھ شہریوں اور بچوں کو بھی نشانہ بنا رہی ہے۔

 دوسری جانب آسیہ کے شوہر بلال احمد کا کہنا ہے کہ یوکرین کی جنگ کے بعد ان کی اہلیہ مسلسل پریشان ہیں۔ وہ اپنے والدین اور ہم وطنوں کے لیے پریشان ہیں۔

 آسیہ نے کہا کہ یوکرین کے لوگ بہادری سے لڑ رہے ہیں لیکن انہیں مدد کی ضرورت ہے۔ دنیا روسی جارحیت کی حمایت نہ کرے، کیونکہ آج یوکرین کو نشانہ بنایا گیا ہے، کل کسی اور ملک کو نشانہ بنایا جا سکتا ہے۔

 آسیہ نے وزیر اعظم نریندر مودی پر زور دیا ہے کہ وہ روسی صدر ولادیمیر پوٹن کو جنگ ختم کرنے پر آمادہ کریں۔ ان کا کہنا ہے کہ اقوام متحدہ کے ساتھ ساتھ  ہندوستان کو بھی روس پر دباؤ ڈالنا چاہیے، تاکہ جنگ ختم ہو اوریوکرینی شہری سکون کا سانس لے سکیں۔