ماسکو: ہندوستان اور روس مشترکہ طور پر یونیورسٹی سطح کا ایک نیا درجہ بندی (رینکنگ) نظام تیار کر رہے ہیں، جسے مستقبل میں برکس ممالک تک توسیع دی جا سکتی ہے۔ یہ بات چیمبر فار انڈو-روسو ٹیکنالوجی کولیبریشن کے ڈائریکٹر دیبجیت چکرورتی نے سینٹ پیٹرزبرگ بین الاقوامی اقتصادی فورم (ایس پی آئی ای ایف) کے دوران ٹی وی برکس کو دیے گئے ایک خصوصی انٹرویو میں کہی۔

ٹی وی برکس کی رپورٹ کے مطابق چکرورتی نے بتایا کہ یہ منصوبہ ماسکو کی ایک معروف یونیورسٹی کے تعاون سے تیار کیا جا رہا ہے۔ ابتدائی مرحلے میں اس کا تجربہ ہندوستان اور روس کے درمیان کیا جائے گا، جس کے بعد اسے دیگر برکس ممالک کے لیے بھی کھولا جا سکتا ہے۔

مجوزہ رینکنگ فریم ورک انڈو-روسیا انوپراکتیکا ٹیکنالوجی ہب اور اس کے شراکت داروں کی ان وسیع تر کوششوں کا حصہ ہے، جن کا مقصد مشترکہ تکنیکی مصنوعات اور ادارہ جاتی نظام تشکیل دینا ہے تاکہ برکس ممالک کے درمیان تعاون کو مزید مضبوط بنایا جا سکے۔

چکرورتی کے مطابق ہندوستان اور روس اس وقت کئی جدید ٹیکنالوجی شعبوں میں مل کر کام کر رہے ہیں، جن میں مصنوعی ذہانت (آرٹیفیشل انٹیلی جنس)، سائبر سکیورٹی، صحت سے متعلق ٹیکنالوجی، تعلیمی ٹیکنالوجی اور قابلِ اعتماد ڈیجیٹل بنیادی ڈھانچہ شامل ہیں۔ انہوں نے بتایا کہ سبز توانائی (گرین انرجی) کے منصوبوں پر بھی بات چیت جاری ہے اور بعض اقدامات میں نمایاں پیش رفت ہو چکی ہے۔

ان کے مطابق یہ تعاون مقامی اور خود انحصار تکنیکی صلاحیتوں کو فروغ دینے اور بیرونی نظاموں پر انحصار کم کرنے کے مشترکہ عزم کی عکاسی کرتا ہے۔ چکرورتی نے کہا کہ ہندوستان اور روس کی جانب سے مشترکہ طور پر تیار کیے جانے والے حل مستقبل میں دیگر برکس ممالک اور عالمی جنوب (گلوبل ساؤتھ) کے ممالک بھی اپنا سکتے ہیں۔

انہوں نے کہا، ’’ہم جو کچھ بھی کر رہے ہیں، اس کا مقصد صرف ہندوستان اور روس نہیں بلکہ پوری برکس پلس برادری کو شامل کرنا ہے۔‘‘ انہوں نے مزید کہا کہ برکس پلس ٹیک فورم اور خود مختار ٹیکنالوجی شراکت داری جیسے منصوبے رکن ممالک میں تکنیکی خود کفالت کو مضبوط بنانے اور اختراع پر مبنی تعاون کو فروغ دینے میں اہم کردار ادا کر سکتے ہیں۔