بارہمولہ (جموں و کشمیر): بارہمولہ پولیس نے 52 راشٹریہ رائفلز (آر آر) کے ساتھ مشترکہ کارروائی میں ایک غیر قانونی اسلحہ نیٹ ورک کا پردہ فاش کرتے ہوئے متعدد غیر ملکی ساختہ ہتھیار اور گولہ بارود برآمد کر لیے ہیں۔ یہ کارروائی 7 جون 2026 کو اس وقت شروع ہوئی جب سکیورٹی فورسز نے چاندسومہ، کنیس پورہ میں ایف سی آئی گودام کے قریب موبائل وہیکل چیکنگ پوائنٹ قائم کیا۔
معمول کی تلاشی کے دوران سری نگر سے بارہمولہ جانے والی ایک سفید ماروتی بریزا (JK02DN-6527) کو روکا گیا۔ گاڑی کی تفصیلی تلاشی لینے پر شریک مسافر کے بیگ سے ترکی میں تیار کردہ کینک ٹی پی 9 ایس ایف میٹے (9x19 ملی میٹر) پستول برآمد ہوئی۔ ملزم کی شناخت وکیل احمد ٹھیکری ولد نورالدین ٹھیکری، ساکن کمال کوٹ، اُڑی کے طور پر ہوئی۔
وہ اس ہتھیار کے لیے کوئی قانونی لائسنس یا اجازت نامہ پیش نہ کر سکا۔ گاڑی کے ڈرائیور نے دعویٰ کیا کہ وہ صرف سواری فراہم کر رہا تھا اور اسلحے کے بارے میں اسے کوئی علم نہیں تھا۔ پولیس نے 7 جون کو ایف آئی آر نمبر 70/2026 آرمز ایکٹ کی دفعات 7/25 کے تحت درج کرکے پستول ضبط کر لی اور اسلحے کے ماخذ اور مقصد کی تحقیقات شروع کر دیں۔
تحقیقات کے دوران 8 جون 2026 کو گرفتار ملزم کی نشاندہی پر کالسی ہردو، کمال کوٹ، اُڑی میں ایک اور تلاشی مہم چلائی گئی۔ یہ کارروائی ایگزیکٹو مجسٹریٹ، مقامی لمبردار اور چوکیدار کی موجودگی میں انجام دی گئی۔ اس دوران سکیورٹی فورسز نے ایک چینی ساختہ پستول، دو میگزین اور 13 زندہ کارتوس برآمد کیے، جنہیں ثبوت کے طور پر ضبط کر لیا گیا۔
پولیس حکام کے مطابق یہ نئی برآمدگی اس بات کی نشاندہی کرتی ہے کہ غیر قانونی اسلحے کی نقل و حرکت اور ذخیرہ اندوزی میں ملوث ایک وسیع نیٹ ورک سرگرم ہو سکتا ہے۔ حکام ہتھیاروں کے ماخذ اور اس نیٹ ورک سے وابستہ دیگر مشتبہ افراد کی شناخت کے لیے تحقیقات جاری رکھے ہوئے ہیں۔
بارہمولہ پولیس نے اپنے بیان میں عوامی سلامتی اور خطے کے امن و امان کے تحفظ کے عزم کا اعادہ کرتے ہوئے کہا کہ سکیورٹی اور عوامی نظم و ضبط کو خطرے میں ڈالنے والی ہر غیر قانونی سرگرمی کے خلاف زیرو ٹالرنس کی پالیسی پر عمل کیا جائے گا۔ پولیس کے مطابق معاملے کی مزید تحقیقات جاری ہیں تاکہ اس نیٹ ورک کے ممکنہ روابط اور دیگر پہلوؤں کو بے نقاب کیا جا سکے۔
