مالویہ نگر آتشزدگی کے واقعہ کے بعد ایودھیا میں 20 ہوٹلوں کا معائنہ: مہندر پرتاپ سنگھ
ایودھیا
ایودھیا کے چیف فائر آفیسر مہیندر پرتاپ سنگھ نے منگل کو بتایا کہ دہلی کے مالویہ نگر میں ایک ہوٹل میں لگنے والی آگ میں 22 افراد کی ہلاکت کے بعد ایودھیا پولیس نے 20 ہوٹلوں اور ریستورانوں کا معائنہ کیا ہے اور جہاں خامیاں پائی گئی ہیں وہاں نوٹس جاری کیے جا رہے ہیں۔
مہیندر پرتاپ سنگھ نے اے این آئی سے گفتگو کرتے ہوئے کہا کہ دہلی میں پیش آنے والے افسوسناک آتشزدگی کے واقعے کے بعد انتظامیہ پورے اتر پردیش میں اسپتالوں، ہوٹلوں، ریستورانوں اور دیگر عوامی مقامات کا معائنہ کر رہی ہے۔
انہوں نے کہا کہ دہلی کے مالویہ نگر ہوٹل میں پیش آنے والے المناک حادثے کے بعد ہمارے ڈی جی نے ایک سرکولر جاری کیا تھا، جس میں تمام اضلاع کو ہدایت دی گئی کہ اسپتالوں، ہوٹلوں، ریستورانوں اور دیگر عوامی مقامات پر خصوصی معائنہ مہم چلائی جائے اور جہاں بھی کوئی کمی پائی جائے اسے فوری طور پر دور کیا جائے۔
انہوں نے مزید کہا کہ ایودھیا میں ہماری توجہ خاص طور پر ہوٹلوں اور ریستورانوں پر مرکوز ہے۔ اب تک ہم 20 ہوٹلوں اور ریستورانوں کا معائنہ کر چکے ہیں۔ جن مقامات پر خامیاں پائی گئی ہیں انہیں نوٹس جاری کیے جائیں گے۔دریں اثنا، 3 جون کو مالویہ نگر میں پیش آنے والے آتشزدگی کے واقعے میں ہلاک ہونے والوں کی تعداد بڑھ کر 22 ہو گئی ہے۔ حکام کے مطابق اتوار کو زیرِ علاج ایک اور غیر ملکی شہری کے انتقال کے بعد ہلاکتوں میں اضافہ ہوا۔
پیر کے روز دہلی کی ایک عدالت، ساکیت کورٹ کمپلیکس نے اس معاملے کے ایک ملزم کیشو نیگی کی ضمانت کی درخواست مسترد کر دی۔ کیشو نیگی اسی ہوٹل میں باورچی کے طور پر کام کرتا تھا جہاں آگ لگی تھی۔ دہلی پولیس نے اسے اتوار کو گرفتار کیا تھا اور پیر کو عدالت میں پیش کیا۔
جج بھانو پرتاپ سنگھ نے دہلی پولیس کی درخواست پر کیشو نیگی کو 14 روزہ عدالتی تحویل میں بھیج دیا۔ نیگی کو مرکزی ملزم اور ہوٹل کے مالک لوکیش بجاج کے ساتھ ساکیت کورٹ میں پیش کیا گیا تھا۔ چار روزہ پولیس ریمانڈ مکمل ہونے کے بعد لوکیش بجاج کو مزید دو دن کے لیے پولیس تحویل میں بھیج دیا گیا۔
اس معاملے میں ایک اور ملزم جے مشرا، جو ہوٹل کا اکاؤنٹنٹ بتایا جاتا ہے، نے پیر کو دہلی کی عدالت میں خودسپردگی کر دی۔ پولیس نے اس سے پوچھ گچھ کے لیے وقت مانگا، جسے عدالت نے منظور کر لیا۔ الزام ہے کہ جے مشرا 3 جون سے مفرور تھا۔ اسے اپنے وکیل کے ہمراہ عدالت میں داخل ہوتے اور حکام کے سامنے خودسپردگی کرتے ہوئے دیکھا گیا۔
.webp "مالویہ نگر آتشزدگی کے واقعہ کے بعد ایودھیا میں 20 ہوٹلوں کا معائنہ: مہندر پرتاپ سنگھ")
