نئی دہلی: کنور یونیورسٹی کے وی سی ڈاکٹر گوپی ناتھ رویندرن کو "مجرم" کہنے کے چند دن بعد، کیرالہ کے گورنر عارف محمد خان نے منگل کو مورخ عرفان حبیب کو "غنڈہ" قرار دےدیا۔ دہلی میں میڈیا کے نمائندوں سے خطاب کرتے ہوئے خان نے کہا: "کیا ایک ماہر تعلیم کا کام جسمانی حملہ کرنا ہے؟ یہ غنڈے کا کام ہے۔ عرفان حبیب ایک غنڈہ ہے۔"

خان 2019 میں کنور میں انڈین ہسٹری کانگریس کے افتتاح کے دوران اپنے خلاف مظاہروں کا حوالہ دے رہے تھے۔ دوسرے دن، ہسٹری کانگریس میں اپنی تقریر میں خلل ڈالنے کی کوشش کا حوالہ دیتے ہوئے، خان نے کہا تھا کہ دہلی میں ان پر حملہ کرنے کی سازش کی گئی تھی۔

حبیب نے الزام کا جواب دیتے ہوئے کہا تھا کہ ماہرین تعلیم اس سازش میں شریک نہیں ہوتے۔ کنور وی سی کے ساتھ تعلقات کشیدہ ہونے کے بعد گورنر نے گزشتہ اتوار کو 2019 کا مسئلہ اٹھایا تھا۔

گورنر نے سی پی آئی (ایم) کے رہنما کے کے راگیش کی اہلیہ کی، جو چیف منسٹر کی پرسنل سکریٹری ہیں، کی کنور یونیورسٹی میں ملیالم کی ایسوسی ایٹ پروفیسر کی تقرری پر روک لگا دی تھی۔

انہوں نے وی سی سے رپورٹ بھی طلب کی تھی جس میں کہا گیا تھا کہ یونیورسٹی خستہ حال ہے۔ منگل کو، دہلی میں میڈیا سے خطاب کرتے ہوئے، خان نے سوال کیا کہ وی سی نے 2019 کی تقریب کے دوران مبینہ حملہ کی اطلاع پولیس کو کیوں نہیں دی۔

انہوں نے کہا کہ لوگوں کو کالے کپڑے پہننے اور فیس بک پوسٹ کرنے پر گرفتار کیا جاتا ہے، لیکن ایسے لوگ ہیں جنہیں یقین ہے کہ وہ مجھ پر حملہ کر سکتے ہیں اور ان کے خلاف کوئی کاروائی نہیں کی جائے گی۔