ممبئی:ملک کے سابق چیف جسٹس بی آر گوئی نے کہا کہ ایک فیصلے میں یہ ذکر کرنے پر کہ درج فہرست ذاتوں (SC) کے لیے ریزرویشن میں ’کریمی لئیر‘ کا اصول نافذ ہونا چاہیے، انہیں اپنی ہی برادری کے لوگوں کی جانب سے ’’وسیع پیمانے پر تنقید‘‘ کا سامنا کرنا پڑا۔

گوئی نے کہا کہ ڈاکٹر بی آر امبیڈکر کے نزدیک مثبت اقدام (Affirmative Action) کسی پسماندہ شخص کو سائیکل دینے کے مترادف ہے، لیکن کیا امبیڈکر یہ سمجھتے تھے کہ وہ شخص زندگی بھر اس سائیکل کو چھوڑ ہی نہ سکے؟

گوئی کے مطابق، امبیڈکر ایسا نہیں سوچتے تھے۔ حال ہی میں چیف جسٹس کے عہدے سے سبکدوش ہونے والے گوئی ممبئی یونیورسٹی میں ’مساوی مواقع کو فروغ دینے میں مثبت اقدام کے کردار‘ کے موضوع پر لیکچر دے رہے تھے۔ انہوں نے امبیڈکر کی برسی کے موقع پر انہیں خراجِ عقیدت پیش کیا اور کہا کہ امبیڈکر نہ صرف ہندوستانی آئین کے معمار تھے بلکہ اس میں درج مثبت اقدامات کے نظریہ کے بھی بانی تھے۔

انہوں نے سوال اٹھایا: امبیڈکر کے مطابق، مثبت قدم اُن لوگوں کو سائیکل دینے جیسا ہے جو پیچھے رہ گئے ہیں۔ اگر کوئی شخص 10 کلومیٹر آگے ہو اور دوسرا صفر پر، تو صفر پر موجود شخص کو سائیکل دی جانی چاہیے تاکہ وہ آگے بڑھ کر 10 کلومیٹر تک پہنچ سکے۔ اس کے بعد اسے اسی شخص کے ساتھ مل کر آگے بڑھنا چاہیے۔

کیا امبیڈکر نے یہ کہا تھا کہ وہ شخص کبھی بھی سائیکل چھوڑ کر آگے نہ بڑھے؟ سابق چیف جسٹس نے کہا، میرے خیال میں یہ امبیڈکر کے تصور کردہ سماجی و اقتصادی انصاف کا نظریہ نہیں تھا۔ وہ رسمی نہیں بلکہ حقیقی معنوں میں انصاف چاہتے تھے۔

کریمی لئیر کے اصول کے مطابق ریزرویشن کا فائدہ اُن سماجی و اقتصادی طور پر مستحکم افراد کو نہیں ملنا چاہیے، خواہ وہ پسماندہ برادری سے ہی تعلق کیوں نہ رکھتے ہوں۔ گویے نے کہا کہ اندرہ ساہنی بنام یونین آف انڈیا مقدمے میں ’کریمی لئیر‘ کے اصول کو تسلیم کیا گیا تھا۔

انہوں نے مزید بتایا کہ ایک دوسرے مقدمے میں انہوں نے خود یہ رائے دی تھی کہ کریمی لئیر کا اصول SC پر بھی نافذ ہونا چاہیے۔ گویے نے کہا کہ اس تبصرے کے بعد انہیں اپنی ہی برادری کے لوگوں کی جانب سے شدید تنقید کا سامنا کرنا پڑا۔

ناقدین نے الزام لگایا کہ وہ خود ریزرویشن کا فائدہ لے کر سپریم کورٹ کے جج بنے اور اب وہی اصول SC کے اُن لوگوں کے خلاف استعمال کر رہے ہیں جو کریمی لئیر میں آتے ہیں۔ انہوں نے وضاحت کی: یہ لوگ یہ تک نہیں جانتے تھے کہ ہائی کورٹ یا سپریم کورٹ کے جج کے آئینی عہدے کے لیے کوئی ریزرویشن نہیں ہوتا۔ گوئی نے مزید کہا کہ گزشتہ 75 برسوں میں حالات بہتر ہوئے ہیں۔

انہوں نے کہا، میں نے پورے ملک اور دنیا بھر کا سفر کیا ہے۔ میں نے دیکھا ہے کہ درج فہرست ذاتوں سے تعلق رکھنے والے کئی لوگ چیف سکریٹری، ڈی جی پی، سفیر یا ہائی کمشنر بنے ہیں۔ گوئی نے کہا کہ مہاراشٹر سماجی اصلاحات کی سرزمین ہے اور جدید بھارت کے نظریے کو جنم دینے والی جگہ سمجھا جا سکتا ہے۔

انہوں نے جیوتی راؤ پھولے اور ساوتری بائی پھولے کے سماجی مساوات کے لیے کیے گئے کاموں کا بھی ذکر کیا۔ انہوں نے کہا، جب عورتیں سماج میں سب سے زیادہ مظلوم تھیں، اسی وقت پھولے میاں بیوی نے ان کے لیے تعلیم کے دروازے کھولے تھے۔