لکھنو
اترپردیش کے بارہ بنکی ضلع کی تحصیل رام سنیہی گھاٹ کے احاطے میں واقع مسجد غریب نواز کی جگہ پر پارک کی تعمیر کے لیے سنگِ بنیاد رکھ دیا گیا ہے۔
اس پارک کو سواتنترتا سنگرام اسمارک بال ادیان کا نام دیا گیا ہے۔
جمعرات کو متعلقہ اسمبلی حلقے کے رکن ستیش کمار شرما نے اس کا باقاعدہ افتتاح بھی کر دیا ہے۔ مسجد غریب نواز کو رام سنیہی گھاٹ تحصیل انتظامیہ نے گزشتہ ماہ مسمار کر دیا تھا اور راتوں رات مسجد کا ملبہ ہٹوا کر اس جگہ کو میدان میں تبدیل کر دیا گیا تھا۔
انتظامیہ کی اس کاروائی کے خلاف علماءمسلمان اور حزب اختلاف کی پارٹیوں نے احتجاج بھی کیا تھا۔ خبر کے مطابق پارک کے جس پتھر کا فیتہ کاٹ کر افتتاح کیا گیا ہے، اس پر لکھا گیا ہے کہ "سواتنترتا سنگرام اسمارک بال ادیان" جو کہ تحصیل کالونی میں رہنے والے ملازمین کے لئے تعمیر کیا گیا ہے۔
پارک کے سنگِ بنیاد کے وقت سی ڈی او ایکتا سنگھ سمیت تحصیل کے تمام اعلیٰ افسران بھی موجود تھے۔(ایجنسی ان پٹ)