آواز دی وائس، نئی دہلی

 اپنے دورہ کابل کے ٹھیک ایک دن بعد چینی وزیر خارجہ وانگ یی نے قومی سلامتی کے مشیر اجیت ڈوبھال اور وزیر خارجہ ایس۔ جے شنکر سے قومی راجدھانی نئی دہلی می ملاقات کی۔وانگ یی نے سب سے پہلے ساؤتھ بلاک میں قومی سلامتی کے مشیر اجیت ڈوبھال سے ملاقات کی۔ اس کے بعد انہوں نے  اپنےہم منصب  ڈاکٹر ایس جے شنکرسے ملے۔

 خیال رہے کہ چینی وزیرخارجہ گذشتہ شب 8 بجے کے قریب کابل سے دہلی پہنچے۔ دونوں ممالک کے درمیان سرحدی تنازعہ کے بعد سے کسی اعلیٰ چینی سفارت کار کا ہندوستان کےلیے یہ پہلا دورہ ہے۔۔  اس مسئلے کے حل کے لیے اب تک فوجی مذاکرات کے 15 دور ہو چکے ہیں۔

وانگ کا دہلی کا دورہ ان کے جنوبی ایشیا کے دورے کا حصہ ہے، جس کے تحت انہوں نے کابل اور پاکستان کا دورہ کیا، جہاں انہوں نے جموں و کشمیر کا مسئلہ اٹھایا تھا۔

چینی وزیرخارجہ میٹنگ کے دوران

اسلام آباد میں اسلامی تعاون تنظیم کے اجلاس کے دوران وانگ نے کہا تھا کہ کشمیر پر ہم نے آج ایک بار پھر اپنے بہت سے اسلامی دوستوں کی پکار سنی ہے اور چین بھی یہی امید رکھتا ہے۔

تاہم ہندوستان نے کشمیر کا غیر ضروری حوالہ مسترد کر دیا۔ وزارت خارجہ کے ترجمان ارندم باغچی نے بدھ کو کہا کہ مرکز کے زیر انتظام جموں و کشمیر سے متعلق معاملات مکمل طور پر ہندوستان کے اندرونی معاملات ہیں۔چین سمیت دیگر ممالک کو تبصرہ کرنے کا کوئی حق نہیں ہے۔ دہلی کے بعد وانگ جمعہ سے نیپال کے دورے پر ہوں گے۔