نئی دہلی

ریپ کیس کی سماعت کے دوران ملزم سے متاثرہ خاتون سے شادی کرنے کا پوچھنے کے بعد جنم لینے والے تنازعہ کو آج چیف جسٹس نے ختم کرنے کی کوشش کی۔

چیف جسٹس آف انڈیا ایس اے بوبڈے نے کہا کہ ان کے ملزم سے پوچھے جانے والے سوال کو غلط طریقے سے پیش کیا جا رہا ہے۔

چیف جسٹس آف انڈیا ایس اے بوبڈے نے کہا کہ عدالت اور ایک تنظیم کے طور پر ہم نے ہمیشہ خواتین کا احترام کیا ہے ۔ انہوں نے مزید کہا کہ میڈیا اور سماجی کارکنان نے ان کے اس تبصرہ کو غلط ضمن میں پیش کیا جس کے بعد تنازعہ پیدا ہوا اور عدالت کی شبیہ کو بھی نقصان پہنچا۔

چیف جسٹس آف انڈیا ایس اے بوبڈے نے کہا کہ اس عدالت نے ہمیشہ خواتین کو سب سے زیادہ محترم سمجھا ہے ۔ ہم نے اس سماعت میں بھی کوئی مشورہ نہیں دیا کہ تم شادی کرلو، ہم نے صرف پوچھا تھا کہ کیا تم شادی کروگے؟ اس عدالتی کاروائی کی پوری طرح سے غلط رپورٹنگ کی گئی۔