نئی دہلی: نائب صدر سی پی رادھا کرشنن نے منگل کے روز قبائلی رہنما اور آزادی کے عظیم مجاہد برسا منڈا کی برسی پر انہیں خراجِ عقیدت پیش کرتے ہوئے کہا کہ ان کی قربانیاں اور نظریات سماجی انصاف اور ہمہ گیر ترقی کے لیے آج بھی مشعلِ راہ ہیں۔

واضح رہے کہ 1900 میں آج ہی کے دن برسا منڈا نے جامِ شہادت نوش کیا تھا۔ انہوں نے انیسویں صدی کے اواخر میں برطانوی نوآبادیاتی حکومت کے خلاف تاریخی قبائلی تحریک ’’الگولان‘‘ (عظیم بغاوت) کی قیادت کی تھی۔ سوشل میڈیا پر اپنے پیغام میں نائب صدر نے کہا کہ برسا منڈا کی زندگی جرات، خودداری اور انصاف کے لیے غیر متزلزل عزم کی علامت تھی۔

انہوں نے کہا، ’’تاریخی الگولان تحریک کے ذریعے انہوں نے ظلم و استحصال کے خلاف مزاحمت کی روح کو بیدار کیا اور قبائلی برادریوں کو اپنے حقوق، شناخت اور وقار کے تحفظ کے لیے تحریک دی۔‘‘ رادھا کرشنن نے یاد دلایا کہ انہیں جھارکھنڈ کے گورنر کی حیثیت سے عہدہ سنبھالنے کے پہلے ہی دن برسا منڈا کی جائے پیدائش اولیہاتو جا کر خراجِ عقیدت پیش کرنے کا موقع ملا تھا، اور حال ہی میں نائب صدر کی حیثیت سے بھی انہوں نے وہاں حاضری دی۔

انہوں نے مزید کہا، ’’بھگوان برسا منڈا کی قربانی اور ان کے نظریات سماجی انصاف، بااختیار بنانے اور جامع ترقی کے قومی سفر میں مسلسل رہنمائی فراہم کر رہے ہیں۔ ان کی میراث آنے والی نسلوں کے لیے ہمیشہ تحریک کا ایک مستقل سرچشمہ بنی رہے گی۔‘‘