ایریزونا: حاملہ خواتین کے پینے کے پانی میں پی ایف اے ایس (فوریور کیمیکلز) کی موجودگی ان کے بچوں کے لیے سنگین خطرات پیدا کرتی ہے۔ ایریزونا یونیورسٹی کے محققین کی ایک تازہ تحقیق کے مطابق ایسے کنوؤں کا پانی، جو پی ایف اے ایس سے آلودہ علاقوں کے قریب واقع ہوں، استعمال کرنے والی خواتین کے بچوں میں کم وزن پیدائش، قبل از وقت پیدائش اور نوزائیدہ موت کے امکانات نمایاں طور پر بڑھ جاتے ہیں۔

تحقیق میں یہ بات بھی سامنے آئی کہ ان کیمیکلز کے اثرات نہایت کم وزن اور بہت زیادہ قبل از وقت پیدائش جیسے نتائج کو تیز کرتے ہیں، جن کا اثر بچوں کی پوری زندگی پر پڑ سکتا ہے۔ پی ایف اے ایس ایسے مصنوعی کیمیکل ہیں جو ماحول میں تحلیل نہیں ہوتے، انسان کے جسم میں جمع ہوتے رہتے ہیں اور معمولی مقدار میں بھی نقصان پہنچانے کی صلاحیت رکھتے ہیں۔

اب تک ہونے والی زیادہ تر تحقیق یا تو جانوروں پر لیبارٹری تجربات پر مبنی تھی یا انسانی خون میں پی ایف اے ایس کی سطح اور صحت کے درمیان تعلقات پر، لیکن دونوں طریقوں میں اہم حدود موجود تھیں۔ اس تحقیق میں محققین نے حقیقی دنیا کے ماحول کو ایک قدرتی تجربہ کے طور پر استعمال کیا۔

ریسرچ ٹیم نے 2010 سے 2019 تک ریاست میں پیدا ہونے والے بچوں کے اعداد و شمار کا جائزہ لیا اور 11 ہزار سے زیادہ ایسے بچوں پر توجہ مرکوز کی جن کی مائیں ان علاقوں میں رہتی تھیں جہاں پی ایف اے ایس سے آلودہ مقامات کے قریب کنوؤں کا پانی استعمال ہوتا تھا۔

پی ایف اے ایس آہستہ آہستہ مٹی سے ہوتے ہوئے زیرزمین پانی میں شامل ہوتا ہے اور پانی کے بہاؤ کی سمت کے مطابق آگے بڑھتا رہتا ہے، اس لیے محققین نے اوپر اور نیچے کی سمت واقع کنوؤں کے پانی کا تقابل کیا۔ نیچے کی سمت والے کنوؤں میں پی ایف اے ایس کی سطح زیادہ پائی گئی، جبکہ اوپر کی سمت والے کنوؤں میں اس کی مقدار نسبتاً کم تھی۔ دلچسپ بات یہ ہے کہ زیادہ تر خواتین کو اس بات کا علم ہی نہیں تھا کہ ان کے پانی میں پی ایف اے ایس موجود ہو سکتا ہے۔

تحقیق کے نتائج انتہائی تشویش ناک تھے۔ پی ایف اے ایس آلودگی والے علاقوں کے نیچے کی سمت کنوؤں سے پانی استعمال کرنے والی حاملہ خواتین میں کم وزن والے بچوں کی پیدائش کے امکانات 43 فیصد بڑھ گئے تھے، قبل از وقت پیدائش کی شرح 20 فیصد زیادہ پائی گئی، جبکہ نوزائیدہ بچوں کی موت کے امکانات میں 191 فیصد اضافہ دیکھا گیا۔ انتہائی کم وزن والے بچوں کی پیدائش کے امکانات 180 فیصد اور 28 ہفتوں سے پہلے پیدائش کے امکانات 168 فیصد زیادہ تھے۔

تخمینوں کے مطابق ہر ایک لاکھ حاملہ خواتین میں ہزاروں اضافی کم وزن بچے، قبل از وقت پیدائشیں اور نوزائیدہ اموات سامنے آتی ہیں۔ معاشی طور پر بھی پی ایف اے ایس کی آلودگی کے اثرات بہت شدید ہیں۔ تحقیق کے مطابق کم وزن پیدائش سے معاشرے کو سالانہ تقریباً 7.8 ارب ڈالر کا نقصان ہوتا ہے، جبکہ قبل از وقت پیدائش اور نوزائیدہ اموات کی وجہ سے مزید 5.6 ارب ڈالر کا نقصان ہوتا ہے۔

اگرچہ پی ایف اے ایس کیمیکلز ابھی بھی کئی مصنوعات میں پائے جاتے ہیں، لیکن پینے کے پانی سے ان کے اثرات ختم کرنے کے لیے مؤثر طریقے تلاش کیے جا رہے ہیں۔ تحقیق میں استعمال ہونے والے طویل زنجیری پی ایف اے ایس کو فعال کاربن فلٹر کی مدد سے پانی سے الگ کرنا ممکن ہے۔ ماہرین کا کہنا ہے کہ حاملہ خواتین کو اگر اپنے پانی میں پی ایف اے ایس کی موجودگی کا شک ہو تو انہیں ضرور ایسا واٹر فلٹر استعمال کرنا چاہیے جو ان کیمیکلز کو صاف کر سکے، کیونکہ ان کا براہِ راست اثر ماں اور بچے دونوں کی صحت پر پڑتا ہے۔