جموں و کشمیر وقف بورڈ کی چیرمین ڈاکٹر درخشاں اندرابی آج صبح قومی راجدھانی دلی سے آجمیر شریف پہنچیں۔ جہاں انہوں نے سلطان ا لہند خواجہ معین الدین چشتی رحمتہ اللہ علیہ کی درگاہ پر حاضری دی اور درگاہ میں چادر اور پھول پیش کئے۔
ڈاکٹر درخشاں اندرابی جو کہ جموں وکشمیر کی ایک سیاسی شخصیت کے علاوہ بی جے پی کینیشنل ایگزیکٹو کی ممبر بھی ہیں ۔ انہوں نے میڈیا سے بات کرتے ہوئے کہا کہ وہ جموں کشمیر وقف بورڈ کی سربراہ بننے کے بعد پہلی بار خواجہ غریب نواز کی درگاہ پر حاضری دینے آئی ہیں اور بقول ان کے انہیں خواجہ غریب نواز سے کافی عقیدت ہے۔
درگاہ کے معروف خادم اور گدی نشین سید افشان چشتی نے ڈاکٹر درخشاں اندرابی کی زیارت اور دعا کرائی۔ ڈاکٹر درخشاں اندرابی نے کہا کہ وہ یہاں آکر دلی اور روحانی سکون محسوس کررہی ہیں اور انہوں نے یہاں ملک کے ساتھ ساتھ جموں و کشمیر میں ترقی خوشحالی بھائی چارے اور امن و سلامتی کی دعا مانگی ۔