مائکروبلاگنگ ویب سائٹ ٹوئٹر اب کچھ ایسے فیچرز پر کام کر رہی ہے جس سے ٹویپس طے کر سکیں گے کہ ان کی کون سی ٹویٹ کسے دکھائی دے۔ اس فیچر کے تحت صارف کو یہ اختیار ہو گا کہ وہ اپنی ٹویٹ کو قابل بھروسہ دوستوں تک محدود رکھ سکے۔
نئے فیچرز کو متعارف کرائے جانے کے حوالے سے تاحال کوئی تاریخ نہیں دی گئی تاہم امکان ہے کہ یہ فیچرز جلد ٹوئٹر صارفین کو میسر ہوں گے۔
اس کے نتیجے میں ٹوئٹر صارفین کے لیے ممکن ہو گا کہ وہ اضافی، ناپسندیدہ یا مخصوص اکاؤنٹس کو ’بین‘ کیے بغیر اپنی ٹویٹس صرف انہیں افراد تک محدود رکھیں جن پر انہیں بھروسہ ہو۔
یہ امکان بھی ظاہر کیا گیا ہے کہ اگر ٹوئٹڑ نیا فیچر جاری کرتا ہے تو ٹویپس کو اپنی ذاتی اور پیشہ ورانہ ٹویٹس کو کسی اضافی اکاؤنٹ کے بغیر الگ الگ رکھنے کی سہولت مل سکے گی۔
خود کو ٹوئٹر کے پروڈکٹ ڈیزائنر کے طور پر متعارف کرانے والے ہینڈل ’اے ڈیزائنر‘ نے ایک تھریڈ کی صورت نئے فیچرز سے متعلق ٹویٹس کی تو یہ بھی بتایا کہ ایپلیکیشن اس وقت کس رخ پر کام کر رہی ہے۔