کیا یہ امیتابھ بچن ہیں؟

Story by  اے ٹی وی | Posted by  [email protected] | 1 Years ago
کیا یہ امیتابھ بچن ہیں؟
کیا یہ امیتابھ بچن ہیں؟

 

 

نئی دہلی: مشہور فوٹوگرافر سٹیو میک کری نے پھر ایک ایسی تصویر شیئر کی ہے جس نے سوشل میڈیا صارفین کو اس کشمکش اور بحث میں ڈال دیا ہے کہ حلیے سے افغان پناہ گزین لگنے والے عمر رسیدہ شخص دراصل ہیں کون؟ کیونکہ وہ بالی وڈ اداکار امیتابھ بچن کی طرح دکھائی دے رہے ہیں۔

این ڈی ٹی وی کی رپورٹ کے مطابق تصویر میں ایک پگڑی باندھے شخص دکھائی دے رہے ہیں، جن کی داڑھی بھی ہے، انہوں نے ایک پرانی طرز کا چشمہ بھی پہن رکھا ہے۔

یہی تصویر 2018 میں وائرل ہوئی تھی اور لوگوں نے خیال ظاہر کیا تھا کہ یہ اس وقت زیرتکمیل فلم ’ٹھگز آف ہندوستان‘ کے سیٹ پر لی گئی ہے۔

اس فلم میں عامر خان، فاطمہ ثنا شیخ نے بھی کام کیا تھا جبکہ کترینہ کیف کی جھلک بھی شائقین کو دیکھنے کو ملی تھی۔ پورٹریٹ اور امیتابھ بچن میں مشابہت اس قدر غیرمعمولی ہے کہ یہی فوٹو ایک بار پھر انٹرنیٹ گردش کر رہی ہے اور لوگ اس کے بارے میں اپنی آرا کا اظہار کر رہے ہیں۔

منگل کو شیئر کی جانے والی اس تصویر کو 75 ہزار سے زیادہ لائیکس ملے۔ زیادہ تر لوگوں کا کہنا تھا کہ یہ بالکل امیتابھ بچن کی طرح ہے جبکہ اب بھی کچھ نے یہ امکان ظاہر کیا کہ یہ ان کی اگلی فلم کے لیے میک اپ کا کمال ہو سکتا ہے۔

ایک صارف نے کچھ یوں تبصرہ کیا ’پہلی نظر پر مجھے یہی لگا کہ یہ امیتابھ بچن ہیں۔‘ اسی طرح ایک اور صارف نے پوچھا ’کیا یہ امیتابھ بچن ہیں؟‘

تاہم بعدازاں یہ بات سامنے آئی کہ تصویر میں آنے والے شخص امیتابھ بچن نہیں ہیں اور نہ ہی یہ ٹھگز آف ہندوستان کا کوئی منظر ہے بلکہ وہ آدمی سرے سے اداکار ہیں ہی نہیں۔

تصویر کے کیپشن میں میک کری نے معلومات دیتے ہوئے لکھا کہ ’یہ تصویر ایک 68 سالہ افغان پناہ گزین کی ہے جن کا نام شابز ہے اور یہ پاکستان میں رہتے ہیں۔‘ (ایجنسی)