آواز دی وائس: نئی دہلی
یونیورسٹی آف اپلائیڈ سائنسز،ارفرٹ جرمنی کے ایک وفد نے دونوں اداروں کے درمیان علمی اور تحقیقی تعاونات کے نئے امکانات کی تلاش کے لیے پروفیسر نجمہ اختر،شیخ الجامعہ،جامعہ ملیہ اسلامیہ سے ملاقات کی۔ جناب وولف گینگ ٹائیفینس وزیر معاشیات،سائنس اور ڈیجیٹل سوسائٹی، تھرینجیا اورپروفیسر ڈاکٹر فرینک سیٹزر، صدر،یونیورسٹی آف اپلائیڈ سائنسز ارفرٹ علمی وتحقیقی تعاون کی توسیع کے لیے بنے وفد کی سربراہی کررہے تھے۔
وفد نے شیخؒ الجامعہ،فیکلٹیز آف اسٹڈی اور انجینرئنگ اینڈ ٹکنالوجی،نیچرل سائنسز،سوشل سائنسز اور آرکی ٹیکچر کے شعبہ جات کے صدور سے طویل بات چیت کی۔ اس گفتگو میں آموزش کے لیے جدید ترین تحقیق اورتکنیک سمیت نئے نئے میدانوں میں علمی و تحقیقی تعاون کی توسیع کے لیے کھلی بحث ہوئی۔
پروفیسر اختر،شیخ الجامعہ جامعہ ملیہ اسلامیہ نے دو دہائیوں میں دونوں اداروں کے درمیان تعمیری تعلق اوراشتراک کو مضبوط کرنے اور اسے وسعت دینے والے رشتے کی اہمیت پرروشنی ڈالی۔
صدرفرینک سیٹزر نے دونوں اداروں کے درمیان اشتراک کی صورت میں دوپروگراموں اور مشترکہ و دہری ڈگریوں کے سلسلے میں جو مواقع دستیاب ہیں اسے تفصیل سے بتایا۔وزیر وولف گینگ ٹائی فینسی نے ہندوستان اور جرمنی کے درمیان اشتراک کی اہمیت پر روشنی ڈالتے ہوئے کہاکہ دونوں اداروں کے درمیان جو علمی و تحقیقی اشتراک رہا ہے وہ کافی کامیاب ماڈل ہے اور اس لائق بھی ہے کہ اسے پوری دنیا کی اعلی دانش گاہیں اپنائیں۔
دونوں اداروں کے سربراہان کے درمیان مومینٹوس کے تبادلے کے ساتھ پروگرام اختتام پزیر ہوا۔
