علی گڑھ مسلم یونیورسٹی کے طلباء نے ہاسٹل کی سہولیات اور آف لائن کلاس کو دوبارہ شروع کرنے کا مطالبہ کرتے ہوئے کیمپس میں دھرنا دیا۔
مظاہرہ کرنے والے طلباء کا کہنا تھا کہ ملک کی دیگر سینٹرل یونیورسٹیوں کو دوبارہ کھولنے کا نوٹیفکیشن جاری کیا جا چکا ہے جبکہ اے ایم یو میں ایسا نہیں ہوا ہے- طلبا نے مانگ کی کہ کیمپس میں تعلیمی سرگرمیاں دوبارہ شروع کی جائیں۔
انہوں نے پروکٹر کو ایک میمورنڈم بھی پیش کیا ، جس میں یونیورسٹی کی سہولیات دوبارہ شروع کرنے کا مطالبہ کیا گیا۔ دوسری طرف یونیورسٹی انتظامیہ نے کہا ہے کہ وہ صرف حکومت کی جانب سے جاری کورونا کے احتیاتی ضوابط پر عمل پیرا ہیں اورانتظامیہ یونیورسٹی بند رکھنے کا کوئی ارادہ نہیں رکھتی۔
اے ایم یو کے ایک انتظامی افسر نے کہا کہ ہم حکومت ہند کی ہدایات پر عمل پیرا ہیں ، لہذا ہم نے ابھی تک کیمپس میں کوئی سرگرمی شروع نہیں کی ہے ۔ واضح رہے کہ آخری سال کے طلبہ ہاسٹل اور آف لائن کلاسوں کو دوبارہ شروع کرنے کا مطالبہ کررہے ہیں۔